السؤال ده هفضل ادور عليه لآخر يوم فى حياتى, كل مرة ألاقى إجابة جديدة, إيه هى الحياة؟ إيه اللى لازم نعمله فيها؟ إيه اللى يخلينا مرتاحين البال؟ و إزاى نعدى منها بسلام؟
دايما اول حاجة بتيجى فى دماغى لما بسأل نفسى السؤال ده, هو آيه من سورة الحديد " اعلموا انما الحياة الدنيا لعب و لهو و زينة"
فعلا الحياة كدة, لو جينا بصينا لتركيبة البنى آدمين, اغلبهم الدنيا بالنسبة ليهم ان يبقى عندى career كويس او حتى لو مفيش كارير بس يبقى فى مرتب كويس اعرف اعيش بيه انا و عيلتى, او عشان يبقى عندى وجهة إجتماعية كويسة, او عشان اتباهى بيه قدام الناس اللى اعرفها, و بعد الفلوس يجى انه لازم يتجوز و بعدين يخلف عشان يبقى هو كدة تمام عمل اللى عليه, لو اتكلمنا عن الطبقة الوسطى العليا اللى انا بنتمى إليها, يبقى هى دى الحياة بالنسبة ليهم, ألاقى شغل كويس بعدين جوازة كويسة بعدين خلفة كويسة و يبقى كدة " الحياة تمام" لو التسلسل ده محصلش بيبقى فى مشكلة كبيرة اللى حواليه يشيلوا طاجن ستهم و هو يبقى شايف ان فى حاجة نقصاه, فى فى حياته مشكلة و إنه إنسان مش كامل, بينسوا ان ده رزق, بينسوا ان ربنا كاتب قدر لكل إنسان و محددله مسار حياة هو الأنسب بالنسبة له.
الحياة بالنسبة لى حاجة تانية خالص, هى خليط من حاجات كتير أوى و كل واحد واخد حتة من الخليط ده و بيكون ده الخليط المناسب ليه, الخليط ده مختلف من بنى آدم لبنى آدم, مينفعش انى آجى اقول اهم حاجة فى الخليط ده هى الفلوس, او الخلفة, او العبادة و بس, كل واحد له خليطه اللى كل اللى فيه هو اهم حاجة بالنسبة له.
بالنسبة لى اهم حاجة فى الخليط بتاع الحياة ككل هو انك تكون مبسوط و راضى و قادر تتعايش مع الخليط بتاعك و راضى بالخلطة و متسمحش لحد يحطك تحت ضغط عشان فى حاجة فى الخليط هو شايفها ناقصة.
بالنسبة لى الخليط اللى انا شايفاه مناسب ليا, هو انى اكون بشتغل شغل بيظهر امكانياتى و بيعيشنى عيشة كويسة و مدينى الفرصة و الوقت و الصفاء الذهنى لأنى اعيش حياة إجتماعية و اتواصل مع الناس بشكل مستمر و أخرج و أروح و آجى مع الناس اللى بحبها, و كمان ادرس دينى صح و يكون فى وقت مخصص كل يوم لمماسة الطقوس الدينية و هواياتى المفضلة و هو ده الخليط اللى انا عايزاه حاليا و لو فى حاجة جديدة اتضافت للخليط هحاول ادخلها برضا تام فى الخليط ده. عشان اوصل للشكل ده من الحياة, اتنازلت عن حاجات ناس كتير شافتى مجنونة عشان سبتها, بس بالنسبة لى انا كدة مرتاحة و فرحانة و راضيه, و هو ده اللى بتكلم فيه, انت شوف الخليط بتاعك الشخصى و انت حابب تضيف فيه إيه هيريحك و ارمى اى ضغوط خارجية على جنب و اوصل للى انت تحبه, بس بلاش تنسى " اعلموا انما الحياة الدنيا لعب و لهو و زينة " فى النهاية الحياة و لا حاجة اصلا, فبلاش تاخد كل حاجة على اعصابك عشان هى اصلا مش ناقصة :D
